Хууль зүй, дотоод хэргийн сайд Х.Нямбаатараар ахлуулсан ажлын хэсэг өнөөдөр 2021 оны 05 дугаар сарын 22-ны өдөр Баян-Өлгий аймагт ажиллав. Баян-Өлгий аймаг дахь эрхлэх асуудлын хүрээний агентлаг, харьяа байгууллагуудын ажилтан албан хаагчидтай уулзалт хийж Засгийн газрын үйл ажиллагааны хөтөлбөрт тусгасан салбарын бодлого, шинэтгэл түүнийг хэрэгжүүлэхэд чиг үүрэг бүхий байгууллагууд ямар үүрэгтэй оролцох, харьяа байгууллага, агентлагийн ажилтан алба хаагчдыг сургаж дадлагажуулах, тэдний нийгмийн асуудлыг шийдвэрлэх талаар тодорхой мэдээлэл хийв.
Уулзалтын дараа Улсын бүртгэлийн хэлтсийн үйл ажиллагаа, ажлын байрны нөхцөл байдалтай танилцаж, тулгамдаад байгаа тус хэлтсийн байрны асуудлыг аймгийн архивын тасгийн хамт ирэх оны улсын төсвийн салбарын хөрөнгө оруулалтаар стандартын шаардлага хангасан байртай болгохоор боллоо.
Хууль зүй, дотоод хэргийн яам, Улсын бүртгэлийн Ерөнхий газар болон БНСУ-ын Солонгосын олон улсын хамтын ажиллагааны байгууллага “КОЙКА”-ын хамтран хэрэгжүүлж буй “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх” төслийн хүрээнд тус аймгийн улсын бүртгэлийн анхан шатны бүх нэгжүүдэд суурин компьютер, олон үйлдэлт принтер, хурууны хээ уншигч, зургийн аппарат болон албан хаагчдад Коронавирус халдвараас урьдчилан сэргийлэх халдвар, хамгааллын хэрэслийн хүлээлгэн өгч буй батламжийг гардууллаа.
Уулзалтын төгсгөлд эрхэлсэн ажилдаа амжилт гарган ажиллаж байгаа тус хэлтсийн Иргэний улсын бүртгэлийн тасгийн дарга бөгөөд ахлах бүртгэгч Д.Аманбек, Хяналтын улсын бүртгэгч А.Еркегүл нарыг Улсын бүртгэлийн тэргүүний ажилтнаар, Улсын бүртгэгч Х.Тилеубек, К.Ерке нарыг Хууль зүйн яамны Жуух бичгээр шагнаж, Харуулын ажилтан Б.Сабиханд гэр өгч урамшууллаа.
Баян-Өлгий аймаг дахь Улсын бүртгэлийн хэлтэс
