Улсын бүртгэлийн байгууллагууд нэгэн зэрэг цахим гадаад паспортыг олгож эхэллээ.
Улсын бүртгэлийн хэлтэст нээлтийн арга хэмжээ болж, анхны Үндэсний энгийн цахим гадаад паспортыг эзэдэд нь гардуулан өглөө.
Монгол Улсын Засгийн газраас хэрэгжүүлж буй цахим үндэстэн болох хөтөлбөрийн хүрээнд хийж байгаа Монгол Улсын иргэний энгийн гадаад пасспортыг цахимжуулах зорилт ийнхүү биеллээ олж байна. Ирэх 6-р сарын 1-ний өдрөөс эхлээд Чингис хаан нисэх онгоцны буудал дээр E-Gate нэвтрүүлж эхлэх юм.
Цахим гадаад паспорт нь зөвхөн тусгай зориулалтын төхөөрөмжид уншигдах бөгөөд та хилийн шалган нэвтрүүлэхээр хилээр орсон гарсан тамга даруулалгүйгээр тусгай төхөөрөмжид уншуулан богино хугацаанд хилээр нэвтрэх боломжтой.
Монгол улс ИКАО-ын гишүүн орныхоо хувьд ИКАО-ын Нийтийн түлхүүрийн санд 82 дахь гишүүн орноор элсэн орж, үндэсний энгийн цахим гадаад паспортыг иргэддээ олгож эхэлж байна.
Ингэснээр Монгол Улсын иргэд гадаадад зорчих болон гадаадаас эх орондоо ирэхдээ шалган нэвтрүүлэх боомтоор хүнтэй харьцахгүйгээр цахим паспортоо тусгай төхөөрөмжид уншуулж, хилийн шалганаар шууд нэвтрэх боломж бүрдэнэ. Түүнчлэн Монгол Улстай харилцан визгүй зорчих орнуудад ч мөн E-Gate төхөөрөмж дээр цахим паспортоо уншуулан нэвтрэх боломж бүрдэж байна.
Цахим гадаад паспортын загварын тухайд төрийн далбааны улаан өнгийн код бүхий улаан өнгөтэй, 48 хуудастай, хуудас бүр тусгай нууцлалтай, Монгол Улсын төрийн тахилгат хайрхнууд, улаан номд орсон ховор амьтдын зураг зэргийг шингээсэн үндэстнийхээ онцлогийг харуулсан загвартай.
Түүнчлэн олон улсын стандартын дагуу өндөр нууцлалтайгаар эх орондоо хийж байгаа гэдгээрээ онцлог. Иргэд та бүхэн Улсын бүртгэлийн ерөнхий газар болон харьяа дүүргийн улсын бүртгэлийн хэлтсүүдээс цахим гадаад паспорт захиалах боломжтой.
